تفانين: ستاره سهله ونفذيها بنفسك

ستاره سهله ونفذيها بنفسك

- الخميس، 24 أبريل 2008

جايبلكم النهارده فكره ستاره سهله جدااااااا فتنفيذها وعمليه فى استعمالها وكمان مش مكلفه...وده شكلها...

نبدأ الشرح ...

...الفكره الرئيسيه ان الستاره هتتعمل زى كيس المخده بالضبط....عرضه حوالى 50سم وطوله ضعف مقاس الشباك او الحائط اللى هتتركب عليه الستاره..يعنى لو الحائط 3متر يبقى الستاره 6متر عشان الكشكشه...تستخدمى قماش من لونين عشان شكلها يبقى ظاهر ولانى الفكره اصلا بتعتمد على اختلاف الالوان..

هتتحتاجى ان الجزء الحديد اللى عليه ماسوره الستاره يكون بتركب عليه ماسورتين ..(لو مش عندك ممكن تشتريها هى بس وتغيرى من الشكل المعتاد للستاره)ودى صورتها. .....

جبتى القماش لونين هتقصى العرض 50سم زى وعامله منهم حساب 5سم الخياطه من جوا يعنى عرضها بعد الخياطه 45...والطول ضعف المسافه اللى موجوده عندك ...طيب هتقولى كده هاجيب قماش كتير؟؟ لا طبعا لا لانك هتوصلى المسافات ببعض وكده هتوفر معاكى كتير..

بعد القص وقبل الخياطه هتيجى على حافه القماش وتمشيه عى الشمعه او النار عشان متننسلش الاطراف... هتخيطيها على القلبه زى كيس المخده بالضبط وبعدين هتقلبيها على العدله (وجه القماش)..هنعمل خطين او مجرى عشان هو ده اللى هتدخل فيه الماسوره...

كده الستاره خلصت .. سهله دواتى هتدخليها كلها فى الماسوره وتلفيها لحد ميظهرلك الشكل بتاعها بحيث كل لفه تلاقى لون..وانا كل مره بغسلها بغير اتجاه اللفه مره يمين ومره شمال وممكن نصفها يمين ونصفها شمال وبتبقى حلوه قوي

وده شكلها قبل متتركب...